ՔՊ խմբակցությունը ԱԺ նախագահի տեղակալի թեկնածուներ առաջադրեց Կոնջորյանին և Ալեքսանյանին, «Ուժեղ Հայաստանը»՝ Վարդևանյանին
03-08-2026 15:23 Հայաստան Քաղաքականություն
1lurer.am Խորհրդարանը քննարկում է ԱԺ նախագահի երեք տեղակալների ընտրության հարցը:
«Ազգային ժողովի կանոնակարգ» սահմանադրական օրենքի 137-րդ հոդվածի համաձայն՝ ԱԺ նախագահի տեղակալների պաշտոններում պատգամավորների կազմից թեկնածուների առաջադրման իրավունքը պատկանում է խմբակցություններին:
Ազգային ժողովի նախագահի երեք տեղակալներից մեկի թեկնածուն կարող է առաջադրվել միայն ընդդիմադիր խմբակցության կազմում ընդգրկված պատգամավորների թվից:
ԱԺ նախագահի տեղակալներն ընտրվում են գաղտնի քվեարկությամբ՝ պատգամավորների ընդհանուր թվի ձայների մեծամասնությամբ:
«Ազգային ժողովի կանոնակարգ» սահմանադրական օրենքի 33-րդ հոդվածի 7.1 մասի համաձայն՝ եթե ԱԺ նախագահի տեղակալի թափուր պաշտոնում թեկնածու չի առաջադրվում, կամ առաջադրված թեկնածուն երեք անգամ չի ընտրվում, ապա այդ տեղակալի ընտրության հարցի քննարկումը համարվում է ավարտված, և քննարկվում է ԱԺ նախագահի հաջորդ տեղակալի ընտրության հարցը:
ԱԺ նախագահի տեղակալի առաջին պաշտոնում թեկնածուի առաջադրման համար ձայնը տրվեց ԱԺ ՔՊ խմբակցության ղեկավար Արուսյակ Մանավազյանին:
Նա հայտնեց՝ ՔՊ խմբակցությունը ԱԺ նախագահի տեղակալի թեկնածուներ է առաջադրել Հայկ Կոնջորյանին և Վահագն Ալեքսանյանին:
ԱԺ նախագահի տեղակալի երրորդ պաշտոնում ընդդիմադիր թեկնածուին առաջադրեց «Ուժեղ Հայաստան» խմբակցության քարտուղար Տիգրան Աբրահամյանը, որը հայտնեց՝ խմբակցությունն առաջադրել է Արամ Վարդևանյանի թեկնածությունը:
