Ֆիզիկական, հոգեբանական և ցանկացած տիպի բռնություն ինձ համար դատապարտելի է. Հայկ Կոնջորյանը՝ եղբոր հետ կապված միջադեպի մասին
03-08-2026 16:37 Հայաստան Քաղաքականություն
1lurer.am 8 տարի քաղաքական գործունեությամբ զբաղված, 8 տարի Ազգային ժողովի ամենաակտիվ պատգամավորներից մեկը եղած, 5 տարի կառավարող խմբակցության ղեկավար եղած Հայկ Կոնջորյանի անձի մասին, անձամբ իր մասին, անձամբ իր գործունեության մասին որևէ հակափաստարկ չկա, որևէ կոմպրոմատ չկա, որևէ հակաթեզ չկա, որևէ ասելիք չկա, դրա համար փորձ են անում թիրախավորել Հայկ Կոնջորյանի հարազատներին, որպեսզի խփեն Հայկ Կոնջորյանին, և դա այդ Հայկ Կոնջորյանի համար հաճելի գնահատական կլիներ:
Այդ մասին ասաց Ազգային ժողովի նախագահի տեղակալի թեկնածու Հայկ Կոնջորյանը՝ անդրադառնալով «Ուժեղ Հայաստան» խմբակցության պատգամավոր Հարություն Մնացակայանի հարցին, թե 2015-2016 թվականների արդարության մարտիկ Հայկ Կոնջորյանն ինչ մեկնաբանություն կտար, եթե տեսներ 10 տարի հետո՝ 2026-ին, ԱԺ փոխնախագահի թեկնածու Հայկ Կոնջորյանի մասին, որի մասին մոտ 10 օր ամբողջ լրատվականներում սկանդալային նյութերից բացի՝ այլ նյութեր չկան:
«Եթե ուշադիր նայեք այդ պատմություններին, դրանց մեջ վիթխարի քանակությամբ ֆեյք նյուզ գոյություն ունի, չեմ կարող հասցնել մի քանի րոպեների ընթացքում ֆեյք նյուզերին անդրադառնալ»,- ասաց նա:
Ճշտող հարցին՝ ուզում եք ասել, որ այն, ինչ լրատվականներում գրվում է, ամբողջությամբ ֆե՞յք է, Կոնջորյանը պատասխանեց. «Ինձ համար դատապարտելի է ցանկացած տեսակի բռնություն՝ ֆիզիկական, հոգեբանական, ցանկացած տիպի բռնություն ինձ համար դատապարտելի է, և այդ հարցի վերաբերյալ կա հարուցված քրեական գործ: Վստահ եմ, որ պատասխանատվություն են կրելու այդ մարդիկ»:
Հիշեցնենք՝ Հայկ Կոնջորյանի եղբորը ծեծի ենթարկելու դեպքի առիթով նախաձեռնվել է քրեական վարույթ, 5 անձի նկատմամբ հարուցվել է հանրային քրեական հետապնդում: Ծեծի համար մեղադրվողներից Նաիրի Հակոբյանը Աբովյանի ավագանու «Քաղաքացիական պայմանագիր» խմբակցության անդամ է:
