Պատմական Հայաստանի գոյությունը չի նսեմացնում Իրական Հայաստանի գոյությունը. Նազելի Բաղդասարյան
05-08-2026 18:30 Հայաստան Քաղաքականություն
armtimes.com «Առավոտից երեկո կրկնում եք, որ լեգիտիմ իշխանություն չէ, ձայները գողացել եք և ծափահարում եք: Բայց ծափահարության մասին խոսելիս ինձ համար առնվազն տարակուսելի է, երբ երկրի նախագահը խոսում էր, և ձեր կողմից արձագանք չկար: Երկրի նախագահը ՔՊ-ից չէ, երկրի սիմվոլ է. դա հարգանքի նշան է»:
Այս մասին Ազգային ժողովի օգոստոսի 5-ի նիստի ժամանակ ասել է «Քաղաքացիական պայմանագիր» խմբակցության պատգամավոր Նազելի Բաղդասարյանը:
Պատգամավորը տարակուսելի է համարում այն, թե ինչու ԱԺ պատգամավորները չեն հարգում օրենքը. երդման արարողության ժամանակ ոտքի չեն կանգնում, երկրի օրհներգի ժամանակ ձեռքը չեն դնում սրտին։
«Դա ՔՊ-ի հիմնը չէ, դա ՀՀ օրհներգն է: Պետական արարողակարգով ընդունված է, որ ձեռքը պետք է դնել սրտին, որովհետև հիմնը բխում է սրտից: Իհարկե հասկանում եմ, որ ձեր ականջներում արձագանքում է Ալեքսանդրովի Великая держава-ն, բայց Հայաստանի հիմնը այլ է, ընկերնե՛ր։
Այդ մասին խոսում է այն, որ ԱԺ դահլիճում այն մարդիկ, որոնք օժտված են առաջնային մանդատով, չեն հարգում օրենքը: Այս մարդկանց այստեղ լինելը պայմանավորված է մեկ կարևոր առաքելությամբ, գործառույթով: Այս մարդիկ եկել են այստեղ, որպեսզի իրենց համոզմունքը ներկայացնեն և փաստեն, որ ջատագովն են չպետության, պետության չգոյության»,- նշել է պատգամավորը։
Եզրափակելով ելույթը՝ Նազելի Բաղդասարյանն անդրադարձել է պատմական և Իրական Հայաստանի մասին քննարկումներին, որոնք, ըստ նրա, չեն հակադրվում. «Պատմական Հայաստանի գոյությունը չի նսեմացնում Իրական Հայաստանի գոյությունը, այն Հայաստանի, որտեղ ես և դուք ապրում ենք: Եվ ուրեմն որպես աքսիոմ ընդունե՛ք, հիշե՛ք, ձեր մանթրան փոխե՛ք՝ հայրենիքը պետություն է, և պետք չէ փնտրել երազանքի հայրենիք, որովհետև մեր հայրենիքը ՀՀ-ն է, որտեղ ապրում ենք»:
